Ս.թ. նոյեմբերի 9-ին ամփոփվեցին Հեքըթոն [ՅԱՆ] Գյումրի 2014 նորարար գաղափարների և ծրագրավորման ամենամյա մրցույթի արդյունքները: Այս տարի մրցույթը տեղափոխվեց Գյումրի ներգրավելու ավելի շատ երիտասարդների և տեխնոլոգիական նորարար համայնքի ակտիվ մասնակից դարձնելու:

58 թիմ Երևանից, Գյումրիից, Վանաձորից և Իջևանից 120 վայրկյանում ներկայացրեցին իրենց գաղափարները գնահատող հանձնաժողովին, որը բաղկացած էր ՏՏ ոլորտի հաջողված ստարտափերի հիմնադիրներից և ՏՀՏ ընկերությունների ներկայացուցիչներից:

 

24 ժամ անընդմեջ 58 թիմ պայքարեցին հանուն հաղթանակի` լսելի դարձնելու իրենց գաղափարներն աշխարհին: Չնայած լարված մրցակցությանը` ստեղծված միջավայրը նպաստում էր մասնակիցների ստեղծարար մտածելակերպի դրսևորմանը և թիմային ոգու ամրապնդմանը: “Շնորհակալ ենք այդ հզոր ալիքը Գյումրի բերելու և մեզ մասնակիցը դարձնելու համար”, ասել է Հեքըթոն [ՅԱՆ] Գյումրի 2014 մրցույթի մասնակից Գայանե Ղանդիլյանը:

 

Այս տարի մրցույթին մասնակցության հայտ էին ներկայացրել աննախադեպ քանակությամբ թիմեր: Ընդհանուր մասնակիցների քանակը կազմում էր ավելի քան 250 հոգի, որոնք ներառված էին շուրջ 60 թիմերում: Մրցույթին մասնակցում էին մեծ քանակությամբ թիմեր  Հայաստանի մարզերից, որոնք առանձնանում էին իրենց եռանդով, գաղափարներով և թիմային ոգով:

 

 

 

Եվ այսիպսով, թեժ մրցույթի պայքարում հաղթողներ ճանաչվեցին հետևյալ թիմերը`

 

•             առաջին տեղ` “Հ#” թիմը, ք. Երևան  - Հ#-ը նոր ծրագրավորման լեզու է, որը նախատեսված է նույնիսկ ցածր դասարանի աշակերտներին ծրագրավորման հիմունքներին ծանոթացնելու եւ ինքնուրույն ծրագիր ստեղծելու համար:

•             երկրորդ տեղ` “Walking Tour App” թիմը, ք. Գյումրի - Walking Tour App նախագիծը iOS and Android հարթակների համար նախատեսված հավելված է, որը հնարավորություն է տալիս զարգացնել զբոսաշրջությունը փոքր քաղաքներում և ոչ այդքան հայտնի վայրերում:

•             երրորդ տեղ` “Paradox” թիմը, ք. Վանաձոր - Paradox” թիմն  առաջարկում է նոր լուծում էլեկտրոնային շղթայի սիմուլյացիայի համար:

•             լավագույն նորարարլուծում – “CloudShare ” թիմը, ք. Երևան - Ամպային լուծում, որը հնարավորություն է տալիս առավել ապահով և համակարգված պահել տվյալները:

 

Բացի դրանից, միջոցառման ընթացքում կազմակերպվեցին մի շարք փոքր մրցույթներ, որոնց  արդյունքում հաղթեցին հետևյալ թիմերը:

 

•             “dHunt” թիմը, ք. Երևան

•             “Find a Job” թիմը, ք. Վանաձոր

 

Հաղթող թիմերը ստացան մի շարք մրցանակներ, այդ թվում` Lenovo Yoga 2 դյուրակիր համակարգիչ, iPad Air պլանշետ, Nokia 830, Samsung Galaxy Tab 4 7.0, Nokia 630 բջջային հեռախոսներ և Kinnect խաղ: Լավագույն նորարար լուծում անվանակարգում “CloudShare” թիմը ստացավ GOCLEVER TAB Aries 10.1 BLT White պլանշետ Ռոստելեկոմ ՓԲԸ-ի կողմից:

 

Հեքըթոն [ՅԱՆ] Գյումրի 2014 2014 նորարար գաղափարների և ծրագրավորման ամենամյա մրցույթ իրականացվեց <ԻննոՈւիքենդ> նախագծի շրջանակում ՀՀ-ում ԱՄՆ-ի դեսպանատան, ՀՀ-ում Շվեյցարիայի դեսպանատան և ՀՀ-ում Եվրամիության պատվիրակության կողմից աջակցությամբ Հանրային լրագրության ակումբի, Ձեռնարկությունների ինկուբատոր հիմնադրամի, Հայաստանում Մայքրոսոֆթ ընկերության, Գյումրիի տեխնոլոգիական կենտրոնի հետ համատեղ:

 

 

Հիշեցնենք, որը Հեքըթոն[ՅԱՆ]-ը Սիլիկոնյան հովտում սկիզբ առած միջոցառում է, որը Հայաստանում իրականացվում է 2011թ.-ից, և հնարավորություն է տալիս նորագույն տեխնոլոգիաների կիրառման, թիմային աշխատանքի եւ ծրագրավորողների ու չ’ծրագրավորողների, այսինքն` այլ ոլորտների մասնագետների համագործակցության միջոցով առկա խնդիրների արդյունավետ լուծումներ առաջարկել: